College leh University-a Mizo subject zirtirtute intelkhawmna pawl, Mizo Literature and Language Teachers’ Academy (MILLTA) hi kum 1988 khan din a ni a. A tirah chuan Mizo Lecturer’s Academy (MLA) tih niin, hun lo kal zelah college zirtirtute nihna siksawi a nih tak avangin tuna a hming hi a lo pu cho ta a ni.
Hruaitu hmasate inpekna leh kaihhruaina a zarah Mizo subject zirna chuan hma a sawn ve ta hle a. Mizorama college zawng zawngah Mizo subject a awm vek tih theih a ni a, chubakah zirna in pathum - MZU, PUC leh ICFAI lamah Master degree thlenga zir theih a lo ni ta bawk a. Chumi piah lamah doctorate thlengin zir theih a lo ni ta bawk. Hetiang a nih avang hian he subject hnuaia hnathawk pawh kan lo pung ve ta hle a, tunah pawh hian member 121 lai kan lo awm ve ta a ni.
Hetianga pawl-in hma a sawn chhoh ve zel avang hian, pawl pawh mumal zawka a kal zel a ngai a, chuvang chuan hruaitu hmasate khan MILLTA Danpui an lo duang chhuak a, chu chu November ni 23, 2019 atanga hman tan tura tih a ni a. Chutih laiin, Danpui thar chu a chulmam ngai lai deuh te chulmam a tula hriat a ni a, chuvang chuan pawl inkhawmpui, December ni 15, 2023-a neih chuan a siam danglam (amendment) pawh chu a pawm leh ta a. He inkaihhruaina dan thar ang hian pawl pawh kaihhruai a ni.
Pawlin hma a sawn ve zel a, pawl member-te inpawh tawnna tur leh zirna in hrang hrangte chetvelna inhriat tawn theihna turin pawl hming social media - Facebook, Instagram leh blog te siam a ni ta bawk a ni.